سؤال
رقم مرجعي: 995166 | قضايا الأسرة و الزواج | 1 إبريل، 2025
التفكير بغير الزوج
حضرة المفتي السلام عليكم ورحمة الله وبركاته انا بنت بعمر ال 20 سنة في سن ال 16 كنت أحب شخص فش بيني وبينه أي علاقة ولا كلام بس حب من طرفي بسبب حكي أخته عنه ومدها اله ولصفاته وهو أكبر مني بتسع سنوات وضليت ادعي ربنا يجمعنا فترة سنتين تقريبا وشاء الله ان لا يكون نصيبي وانخطبت وكتب كتابي على شخص آخر ونسيت الشخص الأول خوفا من أن أكون بخون خطيبي بالتفكير بغيره ولكن الشخص يلي خطبته كنت مجبره عليه وما كنت بدي اياه (مش إجبار بالمعنى الحقيقي بس إنو أقنعوني بشكل غلط وانا احكيلهم بديش ويحكولي فكري فكري وبالآخر وافقت وانا مش مقتنعة وما بدي) وبعد فترة شهرين من الخطوبة بلشت تظهر صفات سيئة جدا بخطيبي وشغلات لا ترضي الله من معاصي وترك صلاة وشرب خمر والكلام مع بنات وبخل شديد وكذب وعقوق والدين والله المستعان فطبعا كإن بنت ملتزمة صار عندي نفور شديد جدا جدا منه وطلبت من أهلي نفسخ كتب الكتاب وأهلي رفضو رغم معرفتهم لكل هالاشياء وضربوني وكانو يجبروني أقعد معه واطلع واروح عنده وانا كنت أكرهه كره ما يعلم فيه إلى الله ولجأت لخال قريب مني على أمل يوقف معي بس انصدمت إنو حكالي ما عنا بنت تطلق (هسا هو حاليا ندمان ودايما يعتذرلي وبحكيلي حقك برقبتي ليوم الدين) فلجأت إلى الله في القيام وبعد عشر شهور منّ الله علي بالانفصال عن هذا الشخص ولله الحمد ولكن يا شيخ انا كثير كنت افكر في الشخص الأول خصوصا لما كانو أهلي يجبروني اقعد مع خطيبي وكنت افتح على صوره وأحفظهم عندي واصمم صور إلي وإله سوا هل علي كفارة على هالاشي لانو كنت على ملة شخص وانا عقلي وتفكيري مع شخص؟ ثاني رغم انه ويشهد الله على كلامي ما عمري كلمته ولا التقيت معه ولا فكرت أعصي ربنا معه وحتى هو ما بعرف شي عني واصلا يمكن ما بعرفني إلا من أخته وابنها الصغير هل أؤثم على الصور والتفكير ؟ حذفت كلشي بس كثير ندمانة وما بنام بالليل من الندم
إجابة
الحمد لله والصلاة والسلام على رسول الله وعلى آله وصحبه ومن والاه وبعد:
ينبغي لك أن تحمدي الله سبحانه وتعالى أن أنقذك من الحال التي كنت عليها، ومنّ عليك بالخلاص من شخص بعيد عن الله كما تقولين. أما بالنسبة لتفكيرك بشخص آخر خلال فترة عقدك على رجل غيره، فهذا من المحرمات، ولا يليق بفتاة مسلمة مرتبطة بعقد شرعي أن تفكر بشخص آخر، حتى لو كان الشخص الذي ارتبطت به سيئا او أكرهت عليه، فالإجبار على شخص أو بغضه لا يسوغ التفكير بغيره! وبناء عليه فما عليك سوى الاستغفار، وألا ترجعي لمثل هذا السلوك أبدا.